非禮之後（上）
嗰一年，我十歲。
佢隻手從我條頸滑落我嘅心口，再從我心口滑落去、滑落去……
感覺好可怕、好核突，好似一條冰冷嘅蛇，滑過我嘅身體。
但呢隻手嘅主人係林姨，佢係我阿媽嘅好朋友，亦係我嘅好朋友琳琳嘅阿媽。
我震驚，我睜大雙眼，我嚇到全身都郁唔到。
唔知過咗幾耐，林姨終於停咗手，琳琳行出嚟：「小瑩，我沖完涼，到你啦。」
係喎，我今日同琳琳一齊去游水，游完水，返琳琳屋企沖涼，琳琳沖先。
林姨摸吓我個頭：「乖，去沖涼啦。」
我飛快地跑入廁所，搏命沖水淋自己，希望沖走嗰種噁心嘅感覺。
但我沖完涼，返到屋企，噁心嘅感覺依然存在。
阿媽問：「今日同琳琳玩得開唔開心啊？」
聽住阿媽溫柔嘅語氣，我終於按捺唔住，嚎啕大哭，將成件事講晒出嚟。
阿媽嚇咗一跳：「吓，你係女仔，林姨又係女人，佢同佢老公感情好好，點會對你做……嗰啲嘢啊。」
我好迷茫，我唔明白，佢哋感情好唔好，同林姨啱啱做嘅事，有咩關係。
阿媽念念有辭：「唔會嘅，唔會嘅，我打電話問吓佢。」
打完電話之後，佢好似鬆一口氣咁，同我講：「林姨講咗啦，佢係驚你游完水凍親，所以搵毛巾幫你擦吓身，途中可能唔小心掂到你囉。」
唔係，絕對唔係，林姨嘅手指擦遍我嘅身體，動作都好……令我唔舒服。
我搏命描述當時嘅場景，嗰種噁心嘅感覺愈嚟愈強烈。
我靈機一觸：「學校上過性教育堂，話遇到呢啲事，可以報案！係，我要報案！」
阿媽激動到跳起：「點可以報案？搞到人人都知，我哋仲點見人？」
我唔明白，「見人」同「報案」有咩關係，我再次用迷茫嘅眼神望住阿媽。
阿媽放軟語氣：「小瑩，報案係要證據嘅，你啱啱沖咗涼嘛，冇晒啲證據㗎啦，報唔到案㗎。」
我啞口無言，好似係喎，我睇偵探電視劇，破案都係要指紋做證據，而我啱啱咁用力沖涼，肯定冇晒指紋。
之後，阿媽又買零食又買玩具，但我冇辦法開心起嚟，每晚發夢，我都夢見林姨摸我嘅情景。
當我返到學校，琳琳笑瞇瞇咁邀請我，下次再去佢屋企玩。
我嚇到成個震晒：「唔去，你阿媽係壞人！」
「你做咩話我阿媽？」琳琳好嬲，佢點都唔信我講嘅嘢。
從此，我冇咗最好嘅朋友。
而且琳琳每次見到我，都會咬牙切齒咁同我講：「我阿媽唔係壞人啊。」
我成日都喊，好彩仲有我阿媽相信我，佢應承我，唔會再同林姨做朋友。
我哋兩家人真係冇再來往。
但林姨每日接琳琳放學，我有時都會撞到佢。
每一次，林姨都若無其事咁同我打招呼。
我當然唔會回應，但每次遇到林姨，夜晚我都會發惡夢，更噁心更可怕嘅惡夢。
我同自己講，好快就小學畢業，之後我就唔會再遇到林姨。
直到中學派位，我同琳琳被分派到同一間中學。
我反對，我唔想同佢讀同一間學校，我唔想再見到林姨。
但阿媽話：「呢間係區內最好嘅中學，你唔讀呢間，就要讀好差嘅學校，冇晒前途㗎啦。」
「冇咪冇囉。」我好嬲。
阿媽放軟語氣：「你都係想避開琳琳，但琳琳係無辜㗎，你咁樣避佢，唔會傷害到佢咩？」
我一時語塞，我都相信，琳琳唔知林姨對我做咗啲咩，佢只係本能地相信佢阿媽。
總之，阿媽軟硬兼施，我都係同意讀呢間中學。
讀中學後，事情變得更糟糕。
林姨入咗家長教師會，學校活動成日都有佢份，而且佢親切熱情，同學都好鍾意佢。
學校聖誕派對，林姨煮咗好多美食，有同學同琳琳講：「你阿媽真係好，如果我阿媽有咁好就好啦。」
我按捺唔住心中嘅怒火：「唔係啊，佢阿媽係衰人，大衰人。」
琳琳拍枱大叫：「你講乜嘢啊，你成日鬧我阿媽，佢明明咁好人。」
「佢非禮我。」呢件事我已經同琳琳講咗一百次。
琳琳撇撇嘴：「咩非禮啫，男人先會非禮女人，女人點會非禮女人。」
同學都企喺琳琳嗰邊：「係囉，我哋睇電視睇戲，啲色狼都係男人嚟。」
「我阿媽叫我小心陌生男人，從來唔會話『小心女人』㗎。」
下集：https://bit.ly/34uexgt
將專頁設定為「搶先看」/ "See first"，最新故仔馬上睇！
我嘅職業係：冒牌喪屍：https://goo.gl/7E71nW
青蛙王子：http://bit.do/faxLr
#短故 #短篇 #小說 #陳美濤 #廣東話 #粵語 #tomatochan #非禮之後
Search